Fighter Fifty naka-eskapo sa SanRem
CEBU, Philippines — Ang Fighter Wine Fighter Fifty mipakita nga seryoso sila sa ilang kampanya sa kampiyonato human ilang gipakauwawan ang lig-on sab nga San Remigio Properties, 86-84 sa open/commercial division sa 2017 Mayor Eddie Gullas Cup basketball tournament niadtong Miyerkules sa gabii didto sa Talisay City Sports Complex.
Si Joseph Nalos mipatuasik og 28 puntos ug si Jayford Rodriquez miamot og 18 puntos alang sa Fighter Fifty nga nakigduyog na karon sa SG/ARQ Builders ug Dumlog/Kimlex sa mga mananaog ning torneyo nga modalit og P80,000 nga ganti sa makampiyon.
Sila si Danny Aying, Bernie Bregondo ug Eliud Poligrates mikadlit og 11 puntos matag usa alang sa Fighter Fifty nga natakilpo kadiyot human milabaw og 10 puntos, 26-16, apan nakabarog ra sab dayon aron pagpakgang sa SanRem.
Ang Sugbuanong PBA D-League star nga si Mark Jayven Tallo maoy nangulo sa SanRem uban sa iyang 16 puntos, samtang sila si Harold Cincoflores ug Raffy Octubre mitali og 11 puntos matag usa ug si Franz Arong dunay 10 puntos sa pilderong kawsa.
Sa inter-barangay level, ang Lawaan III nakaipsot batok sa Poblacion, 98-95 aron pagpaduol niini sa juniors division semifinals.
Puntos matag usa
Fighter Fifty (86) – Nalos 26, Rodriguez 18, Aying 11, Bregondon 11, Poligrates 11, Abadia 6, Almacin 2, Ortega 1
SanRem (84) – Tallo 16, Cincoflores 12, Octubre 12, Arong 11, Aguirre 8, Lao 6, Colonia 6, Taboada 6, Auditor 4, Regalado 3. (BANAT NEWS)
- Latest
