Tepora mitaak na sa South Africa
CEBU, Philippines — Mitaak na sa South Africa si undefeated Omega Boxing Gym star Jhack ‘El Capitan’ Tepora diin atubangon niya ang labing lisud nga hagit sa iyang boxing career batok ni WBO International featherweight champion Lusando Komanisi karong Septiyembre 22 didto sa Oriental Theater.
Si Tepora (20-0, 15KOs) mopaduol sa iyang damgo nga moaway sa world title, apan dili sayon tungod kay gawas nga sa balwarte sa iyang kontra, si Komanisi (21-3, 18KOs) nailhan usab nga usa ka delikadong kontra.
Si Tepora nga nag-ensayo uban sa Philippine team didto sa Baguio pangandam sa maong away laraw nga moputol sa walo ka sunod-sunod nga daog ni Komanisi lakip na iyang kadaogan batok ni ALA boxer Roli Gasca niadtong Disyembre 15 sa ilang IBO title fight.
“This fight will be a stepping stone for his career. We want him to be in a word title fight if he is successful in this one,” matud pa ni Omega Pro Sports International president Pio Paulo Castillo.
Si Tepora, kinsa giubanan sa iyang trainers nga sila si Jinggoy Junco ug Jellyper Tepora gusto nga modaog pinaagi sa knockout aron likayan ang usa ka hometown decision. (BANAT NEWS)
- Latest
