Jaguars batok Cobras

CEBU, Philippines — Tinguha sa University of  San Jose-Recoletos (USJ-R) Jaguars nga momartsa paduol ngadto sa No. 2 spot sa ilang pakigsangka og usab batok sa Southwestern University (SWU)-Phinma Cobras sa 17th Cebu Schools Athletic Foundation, Inc. (CESAFI) men’s basketball tournament karong adlawa diha sa Cebu Coliseum.

Gipahugtan sa Jaguars ang ilang pagkupot sa ikaduhang puwesto bitbit ang 6-2 win-loss record human ilang gipatikyaob sa ikaduhang higayon ang Cebu Institute of Technology-University (CIT-U) Wildcats, 90-75, niadtong Martes sa gabii. Nanginahanglan na lang sila karon nga modaog kaduha sa katapusan nilang upat ka duwa aron makaangkon og twice-to-beat advantage sa crossover semifinals.

Batok sa Southwestern University nga tagak na sa karera alang semis kay katulo pa lang ka daog sa walo ka duwa, ang Jaguars gipaabot nga mao na sab ang modominar ilabi na kay yano nilang gibuntog ang Cobras, 103-88  atol sa una nilang sangka niadtong Agosto 12.

Sa dili makigtige ang USJ-R ug SWU sa alas-  6:45 sa gabii, ang Baby Cobras  makighamag batok sa Don Bosco Greywolves sa ilang  non-bearing game  sa alas 5:15 sa hapon. 

Ang 3-5 nga Baby Cobras ug  2-6 nga Greywolves pulos na nangatagak kay kumpleto na ang Final 4 sa juniors division diin ang University of the Visayas (UV) Baby Lancers nakabira og awtomatik nga luna sa finals gumikan sa pagkulit niini og 9-0 sweep sa eliminasyon.

Ang four-time defending champion Sacred Heart School-Ateneo de Cebu (SHS-ADC) Magis Eagles mitapos isip No. 2 bugti sa ilang 8-1 nga baraha ug duna unya sila’y twice-to-beat advantage batok sa modaog sa knockout match tali sa USJ-R Baby Jaguars ug University of Cebu (UC) Junior Webmasters (BANAT NEWS)