Mary Joy Tabal gipasidunggan sa kapitolyo

CEBU, Philippines — Hingpit na nga natunol ni  Gobernador Hilario Davide III sa Probinsiya sa Sugbo ang P100 mil nga insentibo ngadto sa Cebuana marathoner nga mihatag sa labing unang bulawang medalya sa Pilipinas sa 2017 Southeast Asian Games sa miaging bulan didto sa Putrajaya, Malaysia.

Si Mary Joy Tabal, kuyog ang coach niini nga si John Philip Dueñas mibisita sa buhatan sa gobernador alang sa pagdawat sa iyang incentives gikan sa Probinsiya sa Sugbo.

Matud pa ni Tabal ang maong insentibo dako og matabang sa iyang training ilabi na nga tulo ka tuig ang iyang pangandam alang sa pagsalmot niya sa 2020 Tokyo Olympics.

Si Tabal nagkanayon nga gihikay na niya karon ang iyang visa alang sa duha ka bulan niyang training didto sa Italy.

Hinuon, ang garbo sa Barangay Guba sa bukirang bahin sa siyudad sa Sugbo miingon  nga  nagsugod na siya sa iyang training  dinhi sa Sugbo.

“Karon after two weeks of transition after sa SEA Games, balik na mi training ni coach, build me, conditioning, strenghtening, karon balik mi sa normal, speed training” matud ni Tabal.

Dugang ni Tabal, nga human sa iyang training didto sa Italy modepensa usab siya alang sa iyang ikalimang title sa Milo Marathon karong Disyembre ug dayon mangandam na alang sa Asian Games sunod tuig.

Gawas sa incentives, si Tabal nakadawat usab og round seal sa Cebu Provincial Government. (BANAT NEWS)