Makasaysayon nga kadaogan

CEBU, Philippines — Wala man tuod makakuha og ensaktong atensiyon si Jonas Sultan (14-3, 9KOs) sa makapakurat niyang kadaogan batok ni two-division world champion Johnriel ‘Quadro Alas’ Casimero (24-4, 15KOs) lima ka adlaw ang milabay, apan nakadawat siya og tumang pagdayeg sa tawo nga nakasigpat sa iyang talento nga si Antonio ‘Biboy’ L. Aldeguer, ang Cebu Sports Hall of Famer nga maoy nagtukod sa ALA Boxing Gym.

Daghan ang wala mopabor ni Sultan nga modaog batok sa inilog kaayong si Casimero, apan iyang gipakita ang  makapakugang niya nga performance dayon na ngadto sa pagkulit og impresibong kadaogan pinaagi sa unanimous decision sa ilang title eliminator nga naghatag kaniya og katungod nga mohagit ni IBF super flyweight champion Jerwin Ancajas.

Apan daw sa nasapawan ang kalampusan ni Sultan sa iyang stablemate nga si Milan ‘El Metodico’ Melindo nga nakigbisog sa usa ka duguon ug mangtas nga away sa wala pa moiskor  og  split decision nga kadaogan batok    ni   IBO  champion Hekkie ‘The Hexecutioner’ Budler aron pagdepensa sa iyang IBF light flyweight title niadtong Sabado sa “Pinoy Pride 42: Clash for Glory” didto sa Waterfront Cebu City Hotel and Casino.

Alang ni Aldeguer, dili angayan nga molabay ang daog ni Sultan nga dili makahimo og kasikas kay ang nakab-ot ni Sultan makasaysayanon.

“Nothing much have been said of the big upset of Sultan’s lopsided win against Casimero. That thing I believe is one of the biggest upsets in Philippine boxing history. Imagine a 2-weight division champion with a credible KO record being stunned by an unheralded 16 fight record with 3 losses of Jonas Sultan,” matud pa ni Aldeguer, ang gitamod nga ‘Godfather of Cebu boxing’.

Ang 25-anyos nga si Sultan, sa hilom nagmaya tungod sa natagamtaman niyang kalampusan, apan napuno sa dignidad.

“Positive lang gyud ko sa akong huna-huna nga makaya nako siya madaog,” matud pa sa garbo sa Zamboanga del Norte. “Ang nakapadaog nako atong awaya mao ang akong kaabtik ug paspas nga suntok.  Dili pa siya kaporma, igo na siya.”

Midugang si Sultan nga ganahan kaayo siya nga moduwa nga ‘underdog’ gumikan kay makapadasig kini kaniya.

“Mas nindot manang akoy underdog sa dula kay aron maipakita nako sa mga tawo nga kaya nako ang mga lig-on,” batbat pa ni Sultan.

Sa dihang gisukna kun anaa na ba  sa iyang huna-huna  si  Ancajas sa lagmit maoy labing unang  all-Filipino world championship fight sulod sa dul-an sa 100 na ka tuig, si Sultan nagkanayon nga mag-agad    ra  siya  sa desisyon sa iyang management team. Apan kon siya maoy pabut-on, mas gustoon niyang mangita og laing kontra gawas sa nasud nga gustong motilaw sa kabangis sa iyang mga kinumo inay nga makigpinaksitay sa iyang kababayan. (BANAT NEWS)