Poblacion Occidental sud nas' midget division semifinals
CEBU, Philippines — Si John Melo Beltran mipabuto og 23 puntos ug si Steven Beltran midugang og 21 sa dihang gilubong sa Poblacion Occidental ang Tugbongan, 90-73 aron moabante sa midget division semifinals sa 7th Mayor Teresa 'Nene' P. Alegado Fiesta Basketball Cup sa Consolacion.
Mitampo si Godfrey Sabanal og 14 puntos alang sa Poblacion Occidental nga nakaangkon sab og ‘twice-to-beat’ advantage ngadto sa 'round of four' gumikan sa ilang paghari sa Bracket A.
Bugnaw ang sugod sa Poblacion Occidental hinungdan nga naalkansi sila og kuwatro puntos, 19-23, apan nakarekober sa ikaduhang kuwarter ug nailog ang labaw sa halftime, 46-44.
Kay nakakita og gintang, ang Poblacion Occidental milusad dayon og nagkayong opensiba sa final half aron paglubong sa Tugbongan og 17 puntos. Sila si Matt Estrada ug Jupit Bandiala nagkumboya’g 33 puntos alang sa pilderong Tugbongan.
Sa laing bahin, ang Jugan mipabuhi sa ilang kampanya sa semis human sab nila gilubong ang Casili, 97-71, ingon man ang Nangka human midaog sa Poblacion Occidental, 69-58 sa Inter-Barangay Seniors Category A.
Si Raymond Arena maoy nangulo sa Jugan uban sa iyang 33 puntos, samtang si Paul Iverson Cullango mipatuasik sab og 33 puntos alang sa Nangka.
Sa duha ka knockout games ubos sa SK Juniors Category A, ang Casili mipakaging sa Jugan, 67-55, samtang ang Danglag mipukan sa Tugbongan, 90-85. (BANAT NEWS)
- Latest
