Iesieken, AC Troopers sud semis sa Triple-A Agbay Cup
CEBU, Philippines — Naangkon sa Iesieken ug AC Troopers ang nahibiling duha ka luna sa semifinals human ilang gipilde ang tagsa-tagsa nilang kaatbang sa tagakay nga duwa sa Triple-A Tany Agbay Cup Basketball Tournament 2017 niadtong Domingo sa buntag didto sa Kimwa gym, Mandaue City.
Ang Iesieken mipalagpot sa Don Paulo, 68-60 aron mabira ang katapusang lingkoranan sa semis, samtang ang AC Troopers mitagak sa Black Spyders.
Walay bisan usa ka magduduwa sa Iesieken ang naka-double figures, apan ang tanan nilang 14 ka players ang miiskor nga maoy epektibong hinagiban pagbuntog sa Don Paulo.
Dili na malalis ang resulta sa duwa dihang ang Iesieken milabaw og 23 puntos sa third period, 54-31 sa basket ni Dandy Tagalog.
Nakaiskor unta og 27 puntos si Tawing Grafe, apan anugon lang kay natagak man ang Don Paulo, samtang si Joshua Yu miambit og 10 puntos sa napildeng koponan.
Sa laing bahin, si Richard Madrid mikadlit og 16 puntos aron pangulohan ang AC Troopers nga nakaipsot sa laang sa Black Spyders.
Sila si Ramil Estremos ug Canjo Echavez nagtampohay og 14 puntos, samtang si Lloyd Chavez miambit og 12 puntos sa AC Troopers nga pirmeng naggukod sa third period ug diha na sila hingpit nilabaw sa nahibiling 58 segundos sa duwa sa iskor nga 67-64.
Ang team manager nga si Gilbert Lisen ug si Barak Recto parehong mibugwak og 14 puntos aron mangulo sa Black Spyders, gisundan ni Jhonnel Escober nga adunay 11 puntos.
Ang semifinals hinuon karong Domingo diin ang Iesieken ni Triple-A president Dandy Tagalog moharong sa team Monterroyo ni Dr. Raul Monterroyo sa pasiunang duwa, samtang ang AC Troopers ni P/Insp. Dondon Coloscos makigsangka sa Friends.
Ang liga gipadagan ni commissioner Geryl Bukiron sa abag ni Orly Navarro.
Puntos matag usa
Unang duwa:
AC Troopers (71) – Madrid 16, Estremos 14, Echavez 14, Chavez 12, Baclay 6, Pacquiao 4, Buenavista 2, Ermac 2, Englis 2.
BLACK Spyders (69) – Lisen 14, Recto 14, Escober 11, Mendoza 9, Ygoña 6, M. Mendoza 4, Dela Peña 4, Gogo 3, Budiongan 2, Retiza 2.
Ikaduhang duwa:
IESIEKEN (68) – Tagalog 8, Cuerbo 8, Navarro 8, Quijano 8, Gonzaga 8, Gokotano 6, Sicad 6, Yares 4, Montalban 4, Regis 2, Yatan 2, Almario 2, Lumen 2, Monterde 2.
DON Paulo (60) – Grafe 27, Yu 10, Jarlata 6, Palero 6, Solana 5, Sabang 4, Ygerger 2. (BANAT NEWS)
- Latest
