Convergys padayong miratsada sa E-Leagues
CEBU, Philippines — Si Franz Dionne Dysam mikadlit og 24 puntos uban ang upat ka rebounds sa dihang gipayaka sa two-time defending champion Convergys Converters ang ePerformax Reds, 92-81, sa Tanduay Athletics CSCC E-Leagues for Basketball Season 13 niadtong Sabado sa City Sports Club-Cebu gym.
Miamot si Aldene Jay Batino og 10 puntos, walo ka rebounds ug duha ka assists alang sa Converters, nga nakatabla na karon sa liderato sa Elite Classic uban sa Teleperformance All-Stars ug Accenture Sharks bitbit ang managsamang 8-1 win-loss records.
Kontrolado kaayo sa Converters ang duwa ug wala na nila hatagi pa og tsansa nga makabawi ang Reds human sila misutoy ngadto sa 46-33 nga labaw sa halftime.
Si Robert Gilo mitapos uban ang 25 puntos ug walo ka rebounds, si Nolan Peña mihipos og 15 puntos, siyam ka rebounds ug duha ka assists, samtang si Joey Mari de Guzman mipupo og 12 puntos, tulo ka assists, duha ka steals ug duha ka rebounds apan nakawang ang ilang paningkamot kay ang Reds natagak ngadto sa 4-5.
Sa Evo League, sila si Jade Seno ug Albien Jon Cadungog milansang og 16 puntos matag usa aron agakon ang The Results Spartans ngadto sa 69-59 nga kadaogan batok sa Shearwater Health Crusaders, si Perry Niones mitikdol og 19 puntos, pito ka rebounds ug duha ka steals sa dihang gipakgang sa Teletech Titans ang Author Solutions, Inc. (ASI) Hardbacks, 59-44, samtang si Rainier Dominic Obenza mitali og 19 puntos ug upat ka rebounds alang sa Dyninno Jets, nga nakaipsot batok sa Optum Knights, 62-54. (EBV) (BANAT NEWS)
- Latest
