Convergys mitunol labing unang pilde sa Teleperformance
CEBU, Philippines – Ang Convergys Converters mipakita nga dili sila basta-basta nga defending champion.
Mibugwak og nagkayong opensa pagsugod dayon sa duwa, ang Converters mipakurat sa kanhi way pildeng Teleperformance All-Stars, 62-59, sa Tanduay Athletics CSCC E-Leagues for Basketball Season 13 niadtong Sabado diha sa City Sports Club-Cebu gym.
Sila si Franz Dionne Dysam ug Jaime Pacquiao mikadlit og 17 puntos matag usa, samtang si Aldene Jay Batino miamot og 11 puntos, unom ka rebounds ug duha ka assists alang sa Converters nga mipabarag sa All-Stars human misutoy ngadto sa sayong 12 puntos nga labaw, 20-8. Ilang nasanta ang tinguha sa All-Stars nga makabangon aron paglahutay ngadto sa tres puntos nga kalampusan.
Ang nagbitbit na karon og 7-1 win-loss records, samtang ang All-Stars, nga gipangulohan ni Mon Xavier Dico uban sa iyang 12 points ug six rebounds, nahagba na gyud human mikulit og impresibong 8-0 record.
Sa laing mga duwa, si Archie Batua mihipos og 13 puntos uban ang upat ka rebounds ug duha ka steals sa dihang gilatos sa Accenture Sharks ang Wipro Tigers, 72-62, aron pag-angkon og bahin sa liderato sa Elite Classic uban sa Teleperformance bitbit ang managsamang 8-1 nga baraha, samtang si Jhoneil Geraldizo migilak uban ang 20 puntos sa dihang gimakmak sa Sykes Pioneers Telstra Boomerangs, 86-64, alang sa ikaduha nilang sagunson nga daog human mingsukarap sa nag-una nilang pito ka duwa.
Sa Evo League, si King Luigi Olbes mipupo og 20 puntos ug walo ka rebounds samtang si Robert Rebaño mitali og 17 puntos alang sa Tech Mahindra Tech Mighties nga mipakaging sa Teletech Titans, 61-53, aron sa pagdayon nining paghari sa liderato bitbit ang 8-1 record. Ang Titans natagak ngadto sa 3-5. – EBV (BANAT NEWS)
- Latest
