Mayweather-McGregor fight wala maka-record
CEBU, Philippines — Wala makahimo og rekord ang away nilang Floyd Mayweather Jr. ug Conor McGregor kun halin sa tiket ang hisgutan.
Kini basi sa mga numero nga gipagawas sa Nevada State Athletic Commission kagahapon.
Ang kontrobersiyal nga away niadtong Agosto mikita lamang og $55,414,865.79, ubos ra itandi sa “Fight of the Century” tali nilang Mayweather ug Manny Pacquiao didto sa MGM Grand nga mikita og $72,198,500.
Ang sangka nilang Mayweather ug McGregor, nga gipahigayon didto sa T-Mobile Arena, nakabaligya lamang og 13,094 ka mga tiket nga ubos kaayo sa kapasidad sa binyu nga 20,500. Ang Mayweather-Pacquiao nakabaligya og 16,219 ka tickets.
Sa kinatibuk-an, 137 ka libreng tickets ang gipanghatag sa maong away diin si Mayweather midaog pinaagi sa TKO sa ika-10 nga hugna aron pagkulit og 50-0 record.
Ang labing barato nga tiket nagkantidad og $500, samtang $10,000 ang labing mahal.
Bisan tuod og wala makarekord, mao gihapon kini ang ikaduha sa labing dako nga halin sa mga tiket sa kasaysayan sa Las Vegas. (BANAT NEWS)
- Latest
