All-stars 8-0 na sa E-Leagues
CEBU, Philippines - Ang Teleperformance All-Stars nagpabiling wa’y pilde, apan munasginhawa kay igo lang sila midaog og uno punto batok sa Supportsave Dragons, 78-77 sa Tanduay Athletics CSCC E-Leagues for Basketball Season 13 niadtong Domingo sa City Sports Club-Cebu gym.
Sila si Marcos Jungoy III, Rahne Laborte ug Mon Dico nagkumboya’g 48 puntos alang sa All-Stars nga naghari gihapon karon sa liderato sa Elite Classic bitbit ang 8-0 record.
Si Niño Belande miratsada og 23 puntos, apan wala kini nahimo gumikan kay ang Dragons nakatilaw sa ikaupat nilang pilde sa siyam ka duwa.
Sa laing duwa sa Elite Classic, si Jhoneil Geraldizo maoy nangulo sa balanseng ataki uban sa iyang 15 puntos sa dihang gilubong sa Sykes Pioneers ang SSI Warriors, 89-61 sa sangka tali sa mga wa’y daog nga koponan.
Sila si Sherwin Anghay, Paul Sanchez, Justine Laborte ug Joerico Maneja naghiusa aron pagkadlit og 46 puntos nga nakatabang sa Pioneers pagsanta sa pito ka sagunson nilang pilde.
Sa Evo League, si Robert Rebaño mitali og 23 puntos ug siyam ka rebounds sa dihang gitumba sa Tech Mahindra Tech Mighties ang QBE Generals, 85-80, samtang sila si James Malalay ug Japhet Tuazon nagkumboya’g 31 puntos alang sa Contact Solutions Flying Lemurs nga nakaipsot batok sa Shearwater Health Crusaders, 57-55.
Ang Tech Mighties nag-una gihapon karon sa liderato bitbit ang 7-1 nga baraha, gisundan sa Flying Lemurs nga adunay 7-2 record. (BANAT NEWS)
- Latest