Humble kampiyon sa 2nd San Agustin Boss Kelly Fiesta Cup 2017

CEBU, Philippines - Lab-as pa sa ilang panumduman gikan sa kampiyonato, ang team Humble misakmit na sab og laing korona pinaagi  sa pagpilde sa Assassins, 92-78 sa 2nd San  Agustin Basketball Tournament Boss Kelly Fiesta Cup 2017 sa miaging semana didto sa Sitio Simborio basketball court   sa  Tayud, Lilo-an.

Kasingkasing ug determinasyon maoy gihimong hagdanan sa team Humble aron maangkon ang ikaduhang sunod-sunod nga korona sulod lang sa upat ka buwan.

Ligas kaayo ang duwa gikan sa pagsugod  diin ang Humble  ni Mark Louie Pepito naglisud hinungdan nga nabiyaan sila og tres puntos paghuman sa tulo ka kuwarter, 58-61.

Nausab ang dagan sa duwa sa fourth quarter  human makasagunson og tres si Troi Berame  ug didto naglami na ang duwa hangtod nga nailog sa Humble ang labaw sa nahibiling tres minutos sa duwa. Sukad niadto wala na makarekober pa ang Assassins.

Si Berame mikadlit og 30 puntos, lakip ang pito ka tres nga nakakabig sa organizers pinangulohan ni Arnel ‘Cdu’ Pepito  sa pagpili kaniya isip MVP.

Nanakod sab ang kainit ni Berame ngadto sa tulo niya ka teammates nga  parehong mitampo’g  double   digits. Si Elton Auman mikamada og 19 puntos, si Elper Sison miambit og 17 puntos ug si Mark Louie Pepito miabuno’g 10 puntos sa Humble nga nagsalig sa ilang fourth quarter rally aron pagtiklo sa Assassins.

Si  Berame awtomatik sab sa Mythical Five uban sa iyang teammates nga silang Auman ug Sison ug nilang Johnrey Caparroso ug Joel Brigoli sa Assassins.

Sila si Caparroso ug Brigoli mikadlit og 25 ug 13 puntos aron pangulohan ang napilde nga Assassins. Si Robert Atig mitampo’g 12 puntos, samtang naka-double figures sab si Jun Rayan Pepito pinaagi sa iyang 10 puntos.

Ang Braveheart  ni PO2 Merlou Mercader maoy mipahiluna sa ikatulong puwesto, samtang ang Kacda ni Rocel Meatshop mikapyot sa ikaupat nga dapit.

Sa juniors division, team Destroyer ni Jhon Clevin maoy nahimong kampiyon uban ni Gabriel Berame nga maoy MVP.

Miokupar sa ikaduha ug ikatulo nga dapit mao ang team El Pueblo ug team Mimi’s.

Ang liga gipaluyohan ni Boss Kelly suportado sab nilang Vice Mayor Duke Frasco ug councilor Alfie Pepito.

Puntos matag usa

HUMBLE (92) – Berame 30, Auman 19, Sison 17, ML Pepito 10, Togeno 9, Commendador 8.

ASSASINS (78) – Caparroso 25, Brigoli 13, Atig 12, JR Pepito 10, Cortes 9, Marion 5, Conde 4. (BANAT NEWS)