Teleperformance All-Stars 7-0 na sa E-Leagues
CEBU, Philippines - Si Joseph Villardar mikadlit og 15 puntos dihang gitumba sa Teleperformance All-Stars ang Accenture Sharks, 79-68 sa gubat tali sa duha ka wa’y pildeng koponan sa Tanduay Athletics CSCC E- Leagues for Basketball Season 13 diha sa City Sports Club-Cebu gym.
Midugang si Ereneo Sedurifa og 11 puntos, upat ka rebounds alang sa All-Stars nga kontrolado kaayo ang duwa sukad mibulhot ngadto sa sayong 19-7 nga labaw. Ilang gitak-op ang first half sa iskor nga 46-25 ug wala na sila molingi pa sukad niadto.
Ang All-Stars nagsolo na karon sa liderato sa Elite Classic uban ang 7-0 nga baraha.
Si Archie Batua mihipos og 15 puntos ug si Miguel Calo miiskor og 14 puntos, apan nakawang
ang ilang paningkamot kay ang Sharks nakatilaw sa una nilang pilde sa pito ka duwa.
Sa Evo League, si James Malalay mipabuto og 26 puntos sa dihang gipakgang sa Contact Solutions Flying Lemurs ang Streamline Kangaroos, 78-67 aron pag-inat sa ilang rekord ngadto sa 6-2. Si Norman Guigue mitikdol og 18 puntos uban ang walo ka rebounds ug lima ka steals sa dihang gilatos sa QBE Generals ang Dyninno Jets, 69-61 alang sa ikaupat nilang daog sa pito ka duwa, samtang si Joman Ryan Garduque mipupo og 21 puntos ug 17 ka rebounds alang sa Optum Knights, nga mipukan sa Shearwater Health Crusaders, 61-54 alang sa ikatulo nilang daog uban ang upat ka pilde. (BANAT NEWS)
- Latest
