Phl napilit sa ikaunom
CEBU, Philippines - Nagmingaw ang Team Philippines ug walay nahagdaw nga bulawang medalya kagahapon sa nagpadayong 2017 Southeast Asian Games didto sa Malaysia.
Si Roxanne Yu misakmit sa labing unang medalya sa Pilipinas sa swimming event, apan igo ra kining milandig sa ikatulo alang sa bronze medal.
Ang gymnasts nga sila si Kaitlin De Guzman ug Reyland Capellan mitunol na usab og mga medalya, apan wala na nila mausbi ang duha ka gold medals nga ilang nahatag sa Pilipinas niadtong Martes.
Si De Guzman naka-silver medal lang sa floor exercise ug bronze medal sa balance beam event.
Sa iyang bahin, si Capellan mitiltil og bronze medal sa men’s vault.
Ang Pilipinas nagpabilin sa ikaunom nga dapit sa ilang walo ka gold, 12 ka silver ug 15 ka bronze medals. Nag-una gihapon sa medal tally ang host Malaysia uban ang 43 ka golds, 35 ka silvers ug 24 ka bronzes. (BANAT NEWS)
- Latest
