Jaguars, Lancers magtigi
CEBU, Philippines - Nanghinaot ang University of San Jose-Recoletos (USJ-R) Jaguars nga maprotektahan ang wa’y buling nila nga rekord, apan lisud kini nga tahas gumikan kay ilang harungon mao man ang defending champion University of the Visayas (UV) Green Lancers sa 17th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.
Samtang ang Jaguars mihaw-as gikan sa tulo ka sagunson nga daog, ang Lancers mipakaging sab sa katapusan nilang mga kontra nga nagdugang og kahinam sa ilang sangka nga gikatakda sa alas-6:45 sa gabii.
Sa gihapon, sandigan sa Jaguars mao sila si Jaybie Mantilla, RJ Dinolan, Ricky Peromingan, Nelvin Navarra, Miguel Gastador, Albert Catiloc ug Kido Cabrera sa tinguha nga inaton ang labing nindot nilang sinugdanan ngadto sa 4-0.
Sa habig sa Lancers, gipaabot nga sila si Liberian import Bassieru Sackor, Rey Suerte, Josue Segumpan, Tristan Albina, Jerome Napao, Jayson Balabag, Sheldon Gahi ug Jan Monic Soliva maoy mopas-an sa ilang misyon nga mag-inusara sa ikaduhang puwesto sa standing.
Sa laing bahin, ang Baby Lancers ug Baby Jaguars nga parehong nagtangag og 3-0 nga baraha, mag-ilog sa solong liderato sa juniors division sa ilang panagsangka sa alas-5:15 sa hapon. (BANAT NEWS)
- Latest