Natuman gyud! Irving gi-trade sa Cavs ngadto sa Celtics hulip ni Thomas
CEBU, Philippines - Natuman gyud ang gihandum ni Kyrie Irving nga mobalhin og laing koponan.
Kini human ang Cleveland Cavaliers mi-trade sa All-Star guard ngadto sa Boston Celtics hulip nilang Isaiah Thomas, Jae Crowder, Ante Zizic ug 2018 first-round draft pick kagahapon.
Sukad sa makapa-kurat nga hangyo ni Irving, ang Cavaliers nangita dayon og team nga haum kaayo aron kabalhinan ni Irving nga dili sab sila maalkansi sa pagbinayloay.
Ilang nasugatan ang Celtics nga karon magsandig na ni Irving ug sa bag-o nilang kaplag nga si Gordon Hayward aron mangulo sa ilang kampanya karon nga season.
Si Irving makig-uban karon sa Boston nga naparot sa Cavaliers sa miaging Eastern Conference finals.
Sulagma kaayo nga labing unang regular season game ni Irving uban sa Boston batok sa Cleveland gumikan kay ang Cavaliers mo-host man sa Celtics karong Oktubre 17, usa ka petsa nga gimarkahan nang daan sa mga fans.
Ang 25-anyos nga si Irving, kinsa mi-average og 25.2 points ug 5.8 assists sa miaging season, duna pa’y tulo ka tuig ug $60 million nga nahibilin sa iyang kontrata, samtang si Thomas mahimong usa ka free agent sa sunod nga tuig.
Gibuhian man tuod siya, apan ang Celtics management mapasalamaton gihapon kaayo ngadto sa 28-anyos nga si Thomas gumikan sa dili hitupngan niining natabang sa kalampusan nga ilang natagamtaman sukad ila kining gibira isip final pick sa second round niadtong 2011 NBA Draft, susamang tuig diin si Irving maoy top overall pick. (BANAT NEWS)
- Latest