Wildcats gipanitan sa Green Lancers
CEBU, Philippines - Ang University of the Visayas (UV) Green Lancers literal nga miginhawa ug mibugwak og kayo gikan sa sinugdanan hangtod pagkahuman sa duwa aron pagmasaker sa Cebu Institute of Technology-University (CIT-U) Wildcats, 113-53 sa labing makalisang nga daogsa 17th Cebu Schools Athletic Foundation, Inc. (CESAFI) basketball season niadtong Domingo sa gabii diha sa Cebu Coliseum.
Si Jayson Balabag miratsada og20 puntos, samtang sila si Jerome Napao ug Ted Sagamitikdol og14 puntos matag usa alang sa Lancers nga mipahaguros sa ilang opensiba sa ikaduhang kuwarter, 32-29 aron pagpiang sa Wildcats sa hingpit.
Bisan og anaa na sa ilang kamot ang daog uban ang 54-20 nga labaw sa halftime, wala gyud mihatag og kaluoy ang Lancers kay ila pang gilat-an og maayo ang Wildcats sa final half, 59-33 aron paglubong niini og 60 puntos.
Lain pang duha ang mikadlit og double figures alang sa UV, kansang 13 ka players pulos nakaiskor.
Sila si Sheldon Gahi ug Colleen Testa nagkumboya’g 23 puntos alang sa Lancers nga mikulit sa ikatulo nilang sagunson nga daog human gipakuratan sa University of San Carlos (USC) Warriors, 73-78, sa una nilang duwa niadtong Agosto 6
Si Mariel Muñez dunay 13 puntos ug si Steven Bucao miiskor og 10 puntos sa Wildcats nga wala gihapon makatangag og daog sa lima ka duwa.
Sa laing bahin, ang Warriors mosuway og inat sa ilang daog ngadto sa lima sa dihang ilang sangkaon ang Southwestern University-Phinma (SWU) Cobras sa alas 6:45 karong gabii.
Ang Warriors nagsolo karon sa liderato sa collegiate division uban ang 4-0 nga baraha, samtang ang Cobras naglantaw sa ikaduha nilang daog sa upat ka duwa. (BANAT NEWS)
- Latest
