Espesyal nga ‘Gold’

CEBU, Philippines - Hangtod karon, daw naglutaw pa sa panganod  ang Cebuana Olympian nga si Mary Joy Tabal human siya mitunol sa labing unang gold medal sa Pilipinas sa 29th Southeast Asian (SEA) Games pinaagi sa women's marathon event niadtong Sabado didto sa Putrajaya, Malaysia.

Giladlad ang tanan niyang   kusog   gikan    sa  subsob niyang training didto sa Italy ug Switzerland, si Tabal milabang sa finish line nga labing paspas sa walo ka mga entrante.

Mitala siya og duha ka oras, 48 minutos ug 26 segundos nga dako kaayo og kalamboan sa iyang oras nga 3:04:39 sa 2015 Singapore SEA Games diin midaog siya og silver medal.

Saysay pa sa 28-anyos nga si Tabal, kinsa mikulit og kasaysayan isip labing unang Pinay marathoner sa Olympics sa miaging tuig didto sa Rio de Janiero, Brazil, dili sayon ang iyang kasinatian gumikan kay nag-agi una siya og pipila ka hagit ug mga kalisdanan sa wala pa matungas ang bukid sa kalampusan.

Kahinumduman, si Tabal hapit wala maapil sa Team Philippines human siya gitaktak sa Philippine Athletics Track and Field Association (PATAFA) sa national line-up sa rason nga wala siya makatuman sa mga lagda nga gitamod sa maong asosasyon.

Apan gumikan sa pagpaghot ug kritisismo sa   pipila ka mga opisyal ubos  sa   pagpangulo ni Philippine Sports Commissioner Ramon ‘El Presidente’ Fernandez, nadutlan ang PATAFA hinungdan nga gibalik ra sab dayon sa nasudnong koponan si Tabal, ang garbo sa Barangay Guba,  dakbayan sa Sugbo.

Mao na nga si Tabal mapasigarbuhon kay taliwala sa mga pagsulay nga iyang nabagatan, siya nagpabilin nga lig-on ug puno sa determinasyon  uban ang  tinguha nga makahatag og dungog ug garbo sa tibuok nasudnong Pilipinhon.

Balik lantaw sa tanan niyang naagian, si Tabal miisip sa napugnit niyang bulawang medalya nga espesyal nga bahin sa iyangkinabuhi nga sa kanunay iyang pagahandumon.

“Lahi ang gihatag nga mensahe ani nga gold medal. Special kaayo ni nga gold kay daghan stories behind this ba, so rewarding kaayo ni siya nga kadaogan nako. Worth all the sweats, hard work and time and sacrifices,” matud pa ni Tabal.

Giambisyon ni Tabal ang mas dako nga hagit  ug kini mao ang pagdaog og medalya sa Asian Games duha ka tuig gikan karon.

Apan sa pagka karon, pahimuslan una ni Tabal ang pagtampisaw sa dagat  sa  himaya nunot sa naglagiting niyang kalampusan  nga  maisip na  niyanglegasiya sa mabulokon niyang karera. (BANAT NEWS)