Crawford , Indongo magpinaksitay karon
CEBU, Philippines - Maghilam-osay na og kumo ang duha ka wa’y pildeng boksidor nga sila si Terence Crawford sa America ug Julius Indongo sa Namibia karong adlawa didto sa Lincoln, Nebraska ang teritoryo ni Crawford.
Ang modaog sa 12 ka hugna nilang binakbakay mao unya ang ilhon nga labing tadhan nga super lightweight champion sa kalibotan.
Si Crawford nagbitbit og 31-0 nga baraha uban ang 22KOs, samtang impresibo sab ang gikuptan ni Indongo nga adunay 22-0 uban ang 11KOs record.
Inilog ning maong away ang 29-anyos nga si Crawford nga mihaw-as gikan sa duha ka sunod-sunod nga daog batok nilang John Molina Jr. ug Felix Diaz, ug mipalukapa og lima sa katapusan niyang unom ka kontra.
Sa iyang bahin, si Indongo mipadayag nga wala siya gibati og kahadlok bisan og manulong siya sa tugkaran sa dekalibre niyang kontra. (BANAT NEWS)
- Latest
