Glen Rice Jr. misaad og daog sa TNT katropa
CEBU, Philippines - Isip usa sa mga labing iladong import sa PBA Governors’ Cup, ang kanhi Washington Wizards nga si Glen Rice Jr. misaad nga mohatag og daog sa TNT KaTropa sa labing una niyang duwa sa liga karong adlawa.
Si Rice Jr. maoy mihulip ni Michael Craig.
Ang kanhi NBA shooter misaad nga tabangan ang TNT nga mobitbit og 3-1 nga baraha sa ilang pakigsangka batok sa Rain or Shine Elasto Painters sa alas-6:45. Sa dili pa ilang duwa, magharong una ang GlobalPort Batang Pier ug Kia Picanto sa alas-4:15 sa hapon.
Sayod si Rice Jr. nga dako ang iyang responsibilidad karon ilabi na sa opensa tungod kay ang TNT ang koponan nga adunay labing daghang players nga gipahuwam sa Gilas Pilipinas.
Dili makatabang sa TNT karon sila si Jayson Castro ug RR Pogoy nga atua sa Lebanon alang sa FIBA Asia Cup, samtang si Troy Rosario miuban sa Gilas Pilipinas nga moduwa sa Southeast Asian Games didto sa Malaysia.
Si Rice atbangan ni J’Nathan Bullock nga sama kaniya usa usab ka replacement import. Si Bullock misidlak sa una niyang duwa sa Rain or Shine sa miaging semana diin mirehistro dayon siya og double-double nga 20 puntos ug 16 ka rebounds batok sa Kia. (BANAT NEWS)
- Latest
