Tabal milampos

CEBU, Philippines - Nakahilak sa tumang kalipay ang Cebuana Olympian nga si Mary Joy Tabal human siya milampos sa iyang misyon pagtunol sa Pilipinas sa labing una niining gold medal sa 29th Southeast Asian (SEA) Games  pinaagi sa women’s marathon event.

Maanindot ang sinugdanan sa 28-anyos nga si Tabal diin siya sayong nag-una ug wala na molingi pa dayon ngadto sa pagdominar sa makutas nga karera kagahapong adlawa didto sa Putrajaya, Malaysia.

Gipuga ang tanan niyang kusog gikan sa makuti niyang pagbansay-bansay didto sa Italy ug Switzerland, si Tabal mitaak sa finish line nga labing paspas sa walo ka mga entrante.  Mirehistro siya og duha ka oras, 48 minutos ug 26 segundos nga dako kaayo og kalamboan sa iyang oras nga 3:04:39 nga naghatag lamang kaniya og silver niadtong 2015 Singapore SEAG.

“I really did the hardest training. I didn’t train this hard for nothing. I really worked so hard to get this gold. So yun, nagawa ko po. And salamat sa lahat. Salamat po sa mga sumusuporta sa akin at nagtiwala sa akin,” matud pa ni Tabal nga naghilak sa tumang kalipay samtang gihinabi ni Dyan Castillejo sa ABS-CBN News.

Ang beteranang marathoner nga nakapakita na og aksiyon sa Boston, Los Angeles ug Paris mihatag dayon og mainit nga gakus ni Philippine Athletics Track and Field Association (PATAFA) chief Philip Ella Juico human sa bulawanon niyang kalampusan.

“Of course I’m very happy and overjoyed for the victory. Well, I didn’t expect this to be one sided. I think he was ahead by about five minutes..more than a kilometer,” matud pa ni Juico.

Gumikan sa iyang kadaogan, si Tabal nga mihimo og kasaysayan isip labing unang Pinay marathoner sa Olympics didto sa Rio de Janiero, Brazil sa miaging tuig, milusad sa kampanya sa Pilipinas nga palabwan ang namina niining 29 ka golds sa miaging edisyon sa torneyo nga mahitabo kausa lamang sulod sa duha ka tuig.

Sa kasamtangan, ang Phl dunay usa ka gold, usa ka silver ug duha ka bronze medals aron pagpatong sa ikaunom nga puwesto sa overall standings sunod sa host Malaysia, Singapore, Indonesia, Myanmar ug Thailand.

Gikan sa usa ka linghod nga long distance runner nga mikolapso sa labing una niyang 10K run, taas-taas na gyud og naabtan si Tabal.

Ang garbo sa Guba, usa ka bukirang barangay sa dakbayan Sugbo diin iyang gihulma ang solidong pundasyon sa mabulukon niyang karera, nahimo siyang Olympian ug karon sertipikado nang gold medalist sa international competition.

Sa  laing   bahin, si Tabal makadawat sab og P500,000 nga pinansyal assistance gikan sa siyudad sa Sugbo.

Mao kini ang gibutyag ni Konsehal Jerry  Guardo, ang deputy mayor for sports sa Cebu City.

Matud ni Guardo nga aprobado na ni Cebu City Mayor Tomas Osmeña ang iyang plano ug iyang iduso kini sa konseho karong Agosto 29.

Dugang ni Guardo nga angay lang hatagan og pinansyal nga assistance si Tabal, kinsa naninguha og maayo ug nagsakripisyo aron makab-ot ang gold medal.

Gani, matud ni Guardo nga iya gihapong iduso ang resolusyon bisan og wala pa makadaog si Tabal. (BANAT NEWS)