Parks Jr. miatras sa PBA rookie draft

CEBU, Philippines - Human ni Fil-German Chris Standhardinger,   si  Fil-American Ray Parks Jr. mipahibalo usab nga  moduwa siya sa ikaduha niyang season sa ASEAN Basketball League (ABL)  ug dili mosalmot sa  PBA rookie draft.

Sila si Standhardinger ug Parks mao unta ang gitan-aw nga mag-ilog alang sa No. 1 pick sa rookie draft, apan ang duha adto mangindahay sa ABL.

Sa pagkawala  sa duha, sila si Kiefer Ravena ug Jeron Teng na lang ang gitan-aw nga mga top rookie prospects sa PBA.

Si Parks mao ang sinaligan sa Alab Pilipinas, ang pambato sa nasud. Si Parks mopaubos karon sa giya sa Gilas Pilipinas assistant coach nga si Jimmy Alapag nga bag-o lang gitudlo isip head coach sa Alab.

Sila si Parks ug Standhardinger gipaabot nga mag-abot unya sa ABL tungod kay ang nauwahi moduwa sa defending champion nga Hong Kong Eastern Lions.

Ang duha mag-uban una sa Gilas Pilipinas nga moduwa sa Southeast Asian  Games  nga sugdan ugmang  adlawa didto sa Kuala Lumpur, Malaysia. (BANAT NEWS)