Jaguars batok Panthers

CEBU, Philippines - Suwayan sa University of San Jose-Recoletos (USJ-R) Jaguars  pag-inat sa nindot nilang sinugdanan ngadto sa 3-0 sa dihang ilang sangkaon ang University of Southern Philippines Foundation (USPF) Panthers sa bugtong duwa ubos sa collegiate division sa 17th Cebu Schools Athletic Foundation, Inc. (CESAFI)  karong adlawa diha sa Cebu Coliseum.

Kon ugaling modaog batok sa Panthers human sa ilang duwa nga gikatakda sa alas-5:30 sa hapon, ang Jaguars hayan nga makigsawo sa liderato uban sa wala pa sa’y pilde nga University of San Carlos (USC) Warriors.

Ang Jaguars inilog batok sa Panthers  nga hangtod karon wala pa gihapon makapahimulos sa presensiya sa ilang 6-foot-9 Nigerian import nga si  Rich Managor.

Wala man tuod mikuha si coach Jun Noel og langyaw nga magduduwa aron palig-onon ang ilang puwersa, apan ang iyang mga lokal players kasaligan kaayo.

Kini naglangkob nilang Jaybie Mantilla, Nelvin Navarra, RJ Dinolan, Miguel Gastador, Victor Munez, Ricky Perominan, Kido Cabrera ug Albert Catiloc.

Samtang si Managor padayong nanikaysikay, sila si Lyndon Colina, Roy Quiachon, Clyde Avancena, Edwin Villarta, Kenneth Cada, Mike Patalinghug ug John Alocillo kinahanglan nga mowadwad og mayo aron maputol ang duha ka sagunson nilang pilde.

Sa juniors division, ang University of Cebu (UC) Junior Webmasters naglaraw nga putlon ang duha nila ka sunod-sunod nga pilde sa ilang pakigharong batok sa CIT-U Wildkittens (0-3) sa engkuwentro tali sa mga wala pa’y daog nga koponan sa alas-2:30 sa hapon.

Ang Cebu Eastern College (CEC) Dragons ug ang Don Bosco Greywolves maoy magbugno sa unang duwa sa ala-1 sa hapon, samtang ang SWU Baby Cobras makigpinaksitay sa Baby Warriors sa alas-4 sa hapon. (BANAT NEWS)