Mayweather, McGregor moaway sul-ot ang mas gamay nga gloves
CEBU, Philippines - Gitumanan sa ilang gusto silang Floyd Mayweather Jr. ug Conor McGregor nga mosul-ot og mas gamay nga gloves sa ilang away, apan nakatilaw una sila og kasaba sa usa ka opisyal sa Nevada State Athletic Commission (NSAC) gumikan sa paggamit nila sa isyu aron makamugna og kasikas sa ilang sangka sa naghinapos nga bahin karong bulana.
Ang mga nagpadagan sa Nevada boxing mipahibawo kagahapon nga ang duha ka boksidor dili na mosubay sa naandan nga lagda nga kinahanglan mosul-ot og 10-ounce gloves sa mga away ubos sa timbang nga 154 ka libras.
Nunot niini, ilang giaprobahan ang 8-ounce gloves nga maoy gamiton nilang Mayweather ug McGregor sa giatngan nilang sangka karong Agosto 26 didto sa T-Mobile Arena sa Las Vegas, Nevada.
Gipaboran man tuod nila ang hangyo sa duha ka boksidor, apan wala malikayi ni NSAC Chairman Anthony Marnell ang pagpahungaw sa iyang kaligutgot.
Matud pa ni Marnell nga wala siya makauyon sa paggamit nilang Mayweather ug McGregor sa isyu aron ibaligya ang ilang away sa social media.
Taliwala sa desisyon sa NSAC, si McGregor wa’y kurat nga namahayag nga mas dali ra unya mahuman ang away nga sa sayo pa iyang gitagna dili makaabot og upat ka hugna.
(BANAT NEWS)
- Latest
