Jason Pagara makigharong sa K.O. artist
CEBU, Philippines - Mosaka na og balik sa ring si reigning WBO junior welterweight champion Jason ‘El Niño’ Pagara diin sangkaon niya ang knockout artist gikan sa Ghana nga si Richmond Djarbeng sa supporting main event sa “Pinoy Pride 42: Clash for Glory” karong Septiyembre 16 diha sa Waterfront Cebu City Hotel and Casino.
Mao kini ang unang pagbalik og away sa 29-anyos nga si Pagara (40-0, 25KOs) human sa kapin 10 ka buwan nga makapakita og aksiyon.
Sa iyang katapusang away, si Pagara miiskor og first round knockout nga kadaogan batok ni Mexican Jose Alfaro niadtong Nobiyembre 26 diha sa Cebu Coliseum.
“Nalipay ko kay natagaan ko pagbalik og away. Gusto nako ipadayon akong misyon para makuha ang world title shot,” matud pa sa garbo sa Cagayan de Oro City.
Si Djarbeng kinsa adunay 28-3 record, 22 sa iyang mga biktima pinaagi sa knockout. Aduna siya’y eight-fight winning streak sukad siya napilde pinaagi sa TKO ngadto ni WBO welterweight champion Jeff Horn niadtong 2015 didto sa Australia.
Ang maong fight card nga gipasiugdahan sa ALA Promotions ug ABS-CBN Sports, bidahan ni Milan ‘El Metodico’ Melindo nga modepensa sa iyang IBF junior flyweight belt batok ni IBO title-holder Hekkie ‘Hexecutioner’ Budler sa South Africa.
Sa undercards, ang kanhi two-division world champion nga si Johnriel ‘Quadro Alas’ Casimero makigbinukbukay ni ALA boxer Jonas ‘Zorro’ Sultan sa usa ka IBF junior bantamweight eliminator, samtang si ‘King’ Arthur Villanueva makigsukmagay ni three-time world title challenger Richie Mepranum. (BANAT NEWS)
- Latest
