Standhardinger dili moapil sa PBA Rookie Draft

CEBU, Philippines - Nahugno ang PBA teams tungod kay dili mosalmot si Gilas Pilipinas standout ug Fil-German  Christian Standhardinger sa PBA rookie draft.

Kini human gipahibalo sa kampo ni Standhardinger nga mipirma na kini og kontrata aron moduwa sa Hong Kong Eastern Lions, ang defending champion sa ASEAN Basketball League (ABL).

Ang 6-foot-8 nga si Standhardinger gitan-aw unta nga usa sa mga nag-unang kandidato nga mahimong No. 1 overall pick sa PBA draft, apan  gipili niini ang pagduwa sa ABL.

Ang kanhi US NCAA standout nga si Standhardinger, niduwa sa German commercial league ug human sa iyang kontrata,  mianhi sa nasud aron moduwa sa Gilas Pilipinas.

Ang Gilas coaching staff miingon hinuon nga mas pabor alang kanila nga sa ABL moduwa si Standhardinger tungod kay mas haom ang iskedyul sa liga nga dili matunong sa kampanya sa nasudnong koponan dili sama sa PBA. (BANAT NEWS)