Codera mapasigarbuhon sa iyang tinudloan
CEBU, Philippines - Ang Sugbuanong NBA trainer/coach nga si Jeff Codera nga tua na karon magbasi sa Amerika mapasi-garbuhon sa nakab-ot ni Reggie Hearn, usa sa labing maayo niyang tinun-an.
Duha ka tuig ang milabay, mipahigayon sila og ‘one-on-one’ training sulod sa dul-an usa ka bulan.
Determinado kaayo si Hearn nga mabaid pa og maayo ang iyang abilidad ubos sa paggiya ni Codera nga wala niya panumbalinga ang mag-training sulod sa garahe sa panimalay ni Codera didto sa Santa Cruz, California.
Duha ka semana human sa ilang training, si Hearn nakadawat og tawag nga naghatag kaniya og puwesto sa Reno Bighorns, ang igsuong koponan sa Sacramento Kings sa NBA D-League. Ang 6-foot-4 nga guwardiya mi-average og 11.3 points niadtong 2015 ug 13.5 points sa miaging season uban sa Bighorns.
Niadtong Agosto 14, si Hearn nakadawat og maanindot nga regalo sa ika-26 nga sumad sa adlaw niyang natawhan human siya gilakip sa listahan sa 16 ka players nga mosalmot sa USA Basketball Men’s AmeriCup Team training camp karong Agosto 17-24 didto sa University of Houston.
Ubos sa superbisyon ni coach Jeff Van Gundy, ang training camp maoy mohagpat sa national team nga morepresentar sa US ngadto sa FIBA Americas Cup 2017 karong Agosto 28-30 didto sa Montevideo, Uruguay.Ang opisyal nga 12-member USA team ipahibalo unya sa petsa 24.
“I’m so happy for Reggie (Hearn) that he has been given the opportunity to be part of the USA national team training camp. I am really proud of what he (Hearn) has achieved. Hopefully, he will make it to the final roster,” matud pa ni Codera nga dalaygon sab ang pagsulbong gikan sa pagka-dispatcher sa dyip ngadto na sa usa ka tinamod nga trainer/coach ubos sa USA Basketball. (BANAT NEWS)
- Latest