Bulawang Medalya misyon sa mga Pinoy’ng Boksidor

CEBU, Philippines - Pagdaog og gold medal  sa  tagsa-tagsa nila ka dibisyon maoy misyon sa unom ka Pinoy amateur boxers nga makigsukmagay sa Southeast Asian Games nga mosikad karong Domingo didto sa  Malaysia.

Ang Philippine boxing team pangulohan sa defending gold medalists   nga   sila si Ian Clark Bautista sa flyweight division,  Mario  Fernandez  sa bantamweight ug Eumir Marcial  sa middleweight class.

Moaway sab og balik  si Rio Olympian Charly Suarez  ubos sa featherweight division, samtang mohimo sa ilang debut sa SEA Games sila si Carlo Paalam (junior flyweight) ug  Fil-British  nga si John Marvin (light heavyweight).

Paningkamuton nila nga modaog og bulawang medalya aron makatabang sila sa standing sa nasud, ilabi na nga gitangtang na sa SEA Games ang women’s division nga mao unta’y makahatag og dugang medalya sa Pilipinas.

Si Pat Gaspi, usa sa mga boxing coach sa Phl team miingon nga ang Thailand gihapon ang lig-ong kaatbang sa Pilipinas, hinuon milambo sab ang mga boksidor  gikan sa host team Malaysia. (BANAT NEWS)