Cobras, Wildcats nagpanilap

CEBU, Philippines - Nagmalampuson ang operasyon ni Sacred Heart School-Ateneo de Cebu (SHS-AdC) Magis Eagles All-Star guard Andrew Velasco aron ayuhon ang nabali niining bukog sa tuo niyang paa nga iyang nahiaguman atol sa ilang duwa batok sa Don Bosco Greywolves sa 17th Cebu Schools Athletic Foundation, Inc. (CESAFI) men’s basketball tournament niadtong  Martes  sa gabii diha sa Cebu Coliseum.

Si CESAFI physician Rhoel Dejano mipahibawo sa iyang Facebook page nga ang operasyon gipahigayon ni Dr. Tony San Juan, ang nag-unang orthopaedic surgeon sa Sugbo kagahapon sa buntag diha sa UC Medical Center.

“Surgery was done this morning by Dr. Tony San Juan and went out well. He is going to start rehabilitation tomorrow and may be discharged by Friday or Saturday,” sumala pa ni Dejano sa iyang FB.

Sa makalisang nga hitabo, si Velasco nabalian og bukog sa tuo niyang paa gumikan sa dili maayong pagkatagak human nabanggaan niini si Juan Miguel de la Torre sa dihang siya mi-lay-up sa oras nga 7:50 sa ikatulong kuwarter diin ang Magis Eagles naglabaw og 12 puntos, 32-20.

Pipila ka minutos nga naghigda si Velasco ug nagping-it sa tumang kasakit sa wala pa siya gipagawas sa korte sakay sa stretcher.

Si Dejano mihatag kaniya og first aid sa wala pa siya gidali og dala sa UCMed.

Gihulagway ni Dejano nga grabe ang angol ni Velasco ug sa iyang tan-aw dili na kini makaduwa pa sa nahibiling bahin karong season gumikan kay si Velasco nanginahanglan man og usa ka tuig aron magpaalim sa iyang angol.

Ang wala damha nga pagbiya ni Velasco usa ka dakong suntok sa kampanya sa Magis Eagles nga makakulit og makasaysayanong lima ka sunod-sunod nga titulo sa juniors division, ilabi na kay ang ilang top gunner nga si Jed Colonia wala pa’y klarong makaduwa kay gikan sa ACL injury.

Nagsolo pa hinuon ang Magis Eagles sa liderato bitbit ang 3-0 record. (BANAT NEWS)