All-Stars perpekto gihapon sa E-Leagues
CEBU, Philippines - Si Gamaliel Bas ug Mon Xavier Dico parehong mi-iskor og 12 puntos ug nagkumboya sab sila og 14 ka rebounds sa dihang gipakaging sa Teleperformance All-Stars ang Sykes Pioneers, 67-51, aron pagpabiling way pilde sa Tanduay Athletics CSCC E-Leagues for Basketball Season 13 niadtong Sabado diha sa City Sports Club-Cebu gym.
Ang All-Stars maoy midominar sa duwa sukad nga miposte og 21-9 nga labaw sa unang kuwarter dayon na ngadto sa pagpahugot sa ilang pagkupot sa liderato sa Elite Classic bitbit ang 6-0 record.
Sa laing duwa sa Elite Classic match, sila si Pol Alfeche ug Ernie Ygot nakatigum og 20 puntos ug 14 ka rebounds alang sa Wipro Tigers, nga mikawras sa Telstra Boomerangs, 66-60, alang sa ikaduha nilang daog sud sa lima ka duwa.
Ang Tigers alkansi og 11 puntos sa sayong bahin sa duwa, 9-20, apan miresbak kini hinungdan nga nakasikit ngadto na lang sa tres puntos atol sa halftime, 28-31.
Wala man tuod makadiga og maanindot nga opensiba sa ikatulong kuwarter apan ang Tigers mitak-op sa duwa pinaagi sa nagbagang 21-11 rally aron pagpatikalbong sa Boomerangs.
Si Jaygard Vios mipatuasik og 20 puntos apan nahoyhoy gihapon ang iyang abaga gumikan kay ang Boomerangs nagpabiling bokya sud sa lima ka duwa.
Sa Evo League, si Celso Jayme Jr. mihipos og 20 puntos ug sila si Perry Niones ug Jervis Sildura midonar og 25 puntos, 16 ka rebounds, lima ka steals ug duha ka blocks sa dihang gimakmak sa Teletech Titans ang Dyninno Jets, 59-50. (EBV) (BANAT NEWS)
- Latest