Baby Jaguars daog na usab, UC Jrs. nasugamak
CEBU, Philippines - Ang University of San Jose-Recoletos (USJ-R) Baby Jaguars nakasugakod sa mainit nga resbak sa Southwestern University-Phinma (SWU) Baby Cobras sa endgame aron pagposte og 78-69 nga daog, nga maoy ikaduha nilang sunod-sunod sa 17th Cebu Schools Athletic Foundation, Inc. (CESAFI) basketball season kagahapong adlawa diha sa Cebu Coliseum.
Si John Kirk Gonzaga mitikdol og 19 puntos, 11 niini iyang gibubo sa nagkayong 26-13 rally sa ikaduhang kuwarter nga nagtuboy sa Baby Jaguars ngadto sa 21 puntos nga labaw sa halftime, 44-23.
Diriyot nga mikolapso ang Baby Jaguars apan naka-eskapo gihapon kini ngadto sa otso puntos nga kadaogan bisan og gipabuthan og 21-5 nga bomba sa Baby Cobras sa katapusang hunat sa duwa.
Miabag ni Gonzaga mao sila si Elmer Echavez ug Arnold Dave Ando nga nagkumboya og 28 puntos.
Sa pasiunang duwa, ang University of San Carlos (USC) Baby Warriors mikadlit sa una nilang daog human gibihag ang University of Cebu (UC) Junior Webmasters, 64-61.
Ang Baby Warriors alkansi og otso puntos human sa tulo ka kuwarter, 38-46, apan milusad kini og 26-15 nga ataki sa naghinapos nga bahin aron pagpatukay-ang sa Junior Webmasters.
Walay naka double-digit sa Baby Warriors apan ang balansi nilang opensiba maoy nagbayaw kanila sa himaya.
Si Virlou Orquez mitali og 15 puntos ug si John Bryl Cuyos mipupo og 12 puntos apan pareho silang naminghoy gumikan kay ang Junior Webmasters nasugamak ngadto sa ikaduha nilang sunod-sunod nga pilde nga maoy labing bati nilang sinugdanan sud sa tulo ka tuig. (BANAT NEWS)
- Latest
