Mayweather nausab, midayeg ni McGregor

CEBU, Philippines - Sa miagi nilang panag-abot aron i-promote ang umaabot nilang away, kanunay nga birahan ni Floyd Mayweather og mga insulto, kantiyaw ug sakit nga pulong si Conor McGregor.

Mao sab ang gibuhat sa tinamod nga UFC star batok sa kanhi pound-for-pound king nga hangtod karon wala pa’y pilde sa boksing.

Apan ning bag-o  lang, nausab ang tono ni Mayweather ug daw sa mikalma kini nga dili tipikal sa iyang kinaiya nga init og ulo.

Kini human si Mayweather, sa wala damha nga higayon  mipadayag sa iyang pagdayeg ni McGregor isip usa ka banggiitang atleta.

“He’s (McGregor) a true warrior,” matud pa ni Mayweather  uban ang pangayo og pasaylo sa mga insulto nga iyang gibuhat ngadto ni McGregor nga nakatandog sab sa sensitibong balatian sa mga sakop sa LGBT community.

Kon bokal kaayo siya kaniadto, tak-om na karon ang baba ni Mayweather  dihang gisukna kon unsa’y iyang prediksiyon sa giatngan nilang engkuwentro karong Agosto 26 didto sa T-Mobile Arena sa Las Vegas.

Matud pa ni Mayweather nga bugtong niyang ikapasalig mao ang pagdalit sa mga fans og usa ka makalingaw ug puno sa aksiyon nga away.