Banat ( Leaderboard Top ), pagematch: 1, sectionmatch: 1

SHS-Ateneo, UV Jrs. 2-0 Na

CEBU, Philippines - Ang four-time champion Sacred Heart School-Ateneo de Cebu (SHS-AdC) Magis Eagles ug ang University of the Visayas (UV) Baby Lancers milayat ngadto sa ikaduha nilang sagunson nga daog aron pagsawo sa liderato sa juniors division sa 17th Cebu Schools Athletic Foundation, Inc. (CESAFI) basketball season kagahapon diha sa Cebu Coliseum.

Dali nga nakabawi ang Magis Eagles gikan sa bugnaw nga sinugdanan aron pagpayaka sa Cebu Institute of Technology-University (CIT-U) Wildkittens, 78-55, samtang ang Baby Lancers nagmangtas sa final half aron paglampurnas sa Don Bosco Greywolves, 88-69.

Naglabaw lamang og kuwatro puntos ang Magis Eagles human sa unang kuwarter, 18-14, salamat sa mainit nga mga kamot ni Benedict Yu ug wala madugay nakuha nila ang ensakto nilang poste aron pag-abante  og 10 puntos atol sa halftime, 38-28.

Wala na molingi pa sukad niadto ang Magis Eagles. Human gitak-op ang ikatulong kuwarter sa iskor nga 56-41, ilang gitiwasan og kulata ang Wildkittens dayon na ngadto sa pagkulit og 26 puntos nga labaw, 76-50  sa nahibiling dos minutos.

Si Patrick Yu maoy nangulo sa Magis Eagles uban sa iyang 17 puntos, samtang si Benedict Yu miamot og 12 puntos.

Sa unang duwa, si Justin Jake Rosete mitali og 19 puntos ug si Jhey Paraldo midugang og 17 puntos alang sa Baby Lancers, nga  milabaw lang og tres puntos sa first half, 42-39.

Sukad niadto, kontrolado na sa Baby Lancers ang duwa.

Human nakabentaha og otso puntos, 65-57, gisirad-an sa Baby Lancers ang duwa pinaagi sa nagkayong 24-13 rally aron paglubong sa Greywolves og 19 puntos.

Sila si JB Damolo, Jayson Abejo ug Jomari Ranuco nagkumboya’g 45 puntos, apan nakawang ang ilang paningkamot gumikan kay ang Greywolves nakatilaw sa  una nilang pilde.

  • Follow Us: