Warriors, Panthers mag-ilog sa liderato
CEBU, Philippines - Ang University of San Carlos (USC) Warriors ug ang University of Southern Philippines Foundation (USPF) Panthers magsangka alang sa sayong liderato sa collegiate division sa 17th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.
Mag-abot ang Warriors ug Panthers sa alas-6:45 sa hapon, human ang University of San Jose-Recoletos (USJ-R) Baby Jaguars makigtigi sa Cebu Eastern College (CEC) Dragons sa pasiunang duwa sa alas-5:15 sa hapon.
Ang Warriors miabli sa ilang kampanya pinaagi sa pagpakugang sa defending champion University of the Visayas (UV) Green Lancers, 78-73.
Samtang ang Panthers mihimo sab dayon og kasikas human gilayog ang Cebu Institute of Technology-University (CIT-U) Wildcats sa iskor nga 82-72.
Taas karon ang kompiyansa sa Panthers gumikan kay gawas nga daghan sila og mga sinaligan, duna sab sila’y import sa labing unang higayon.
Ang 6-foot-9 Nigerian nga si Rich Managor tataw makapabagsik sa Panthers nga duna na’y duha ka All-Stars daan nga sila si Lyndon Colina ug Roy Quiachon.
Apan masukod ang tinuoray nga abilidad ni Managor sa Panthers sa ilang pakigharong karon sa Warriors nga dili kakompiyansaan bisan og wala kini langyaw nga magduduwa.
Moduwa nga walay import ning higayona, gipaabot nga magdala sa away alang sa Warriors mao sila si Victor Rabat, Kevin Oleodo, Julius Cavadis, Kent Cabanog, Ken Oguis, Lucky Ecarma, Malcolm Tan, John Saycon ug Froilan Mangubat. (BANAT NEWS)
- Latest
