Pescos, Sorongon misidlak sa una nilang international race

CEBU, Philippines - Ang duha ka long- distance runners nga sila si Rafael Pescos ug Ruffa Sorongon nga parehong nagbasi dinhi sa Sugbo mihimo og kasikas sa labing una nilang karera gawas sa nasud pinaagi sa Manulife Da Nang International Marathon niadtong Domingo didto sa Da Nang, Vietnam.

Si Pescos mirehistro og duha ka oras, 40 minutos ug sayes segundos aron pagpahiluna sa ikaduhang dapit sa men’s 42K. Sayes segundos lamang maoy biya niya sa kampiyon nga si Izawa Satoshi sa Japan, samtang ang garbo sa Vietnam nga si Tuan Le Van Tuan maoy mitapos ikatulo sa oras nga 2:48:27.

Sa iyang bahin, si Sorongon ikatulo sa women’s 21K  sulod sa usa ka oras, 27 minutos ug 38 segundos. Ang iyang mga kauban sa Team 7-Eleven Philippines nga si Jho-An Villarma (1:31:53) ug Nhea Ann Barcena (1:37:08) maoy miharos sa nag-unang duha ka puwesto.

“Happy naman ako kahit second lang kasi first time kung maglaro nang international marathon. Kahit na bugbog yung katawan ko sa Milo Marathon last week, pinilit kung makapasok nang second para kahit papano maiwagayway ko ang bandila ng Pilipinas,” matud pa ni Pescos, ang pambato sa Spectrum Runners nga maoy naghari sa Manila qualifying sa 41st National Milo Marathon sa miaging semana. (BANAT NEWS)