Warriors mipakurat sa Lancers

CEBU, Philippines - Ang University of San Carlos (USC) Warriors daw sa mitagak og bomba usa ka adlaw human magsugod ang 17th Cebu Schools Athletic Foundation, Inc. (CESAFI) basketball season human ilang gipaluhod ang defending champion University of  the Visayas (UV) Green Lancers, 78-73, kagabii sa Cebu Coliseum.

Mikagar ang opensa sa Lancers apan angay nga daygon ang Warriors gumikan sa maayo niining labok sa kinatibuk-ang bahin sa duwa.

Si Victor Rabat maoy mitali sa nag-unang siyete puntos sa duwa alang sa Warriors apan sila si Josue Segumpan, Jerome Napao ug Tristan Albina milansang og tulo ka sunod-sunod nga tres aron pagdagkot sa opensa sa Lancers.

Nailog gyud sa UV ang labaw human sa unang kuwarter, 16-14, apan si Froilan Mangubat miposa og duha ka 3-pointers sa 8-0 run nga nakapaabante og balik sa Warriors, 22-16.

Mi-abante sa katapusang higayon ang Lancers sa iskor nga 47-46 sa tres ni Coleen Testa gumikan kay gitak-op sa Warriors ang ikatulong kuwarter pinaagi sa 7-0 run aron pagposte niini og 53-47 nga bintaha.

Salida na tanan sa Warriors sa katapusang hunat sa duwa diin sila naglabaw og double-digit pipila ka higayon, ang kinadak-an sa iskor nga 72-58, human nakasagunson og tres silang Rabat ug Lucky Ecarma sa nahibilin nga 2:49.

Nakasikit ang Lancers sa katapusang higayon, 68-72, gumikan kay sila si Cabañog, Julius Cadavis ug John Saycon sunod-sunod nga nakapuntos pinaagi sa breakaway layups nga nakapaginhawa sa Warriors og lawom, 78-70, sa nahibilin nga 20 segundos.

Sila si Rabat ug Cabañog parehong mitapos uban ang 17 puntos samtang si Cadavis mitapos og 10 puntos alang sa Warriors nga misugat sa bag-o nilang head coach nga si Bong Abad pinaagi sa usa ka dakong buto.

Si Napao mihipos og 14 puntos, ang import nilang si Bassieru Sackor mitali og 13 samtang sila si Segumpam ug Rey Suerte mipupo og 11 puntos matag usa alang sa Lancers nga nasugamak dayon pagsugod sa ilang depensa. (BANAT NEWS)