Fajardo wa’y klaro moduwa sa FIBA
CEBU, Philippines - Kuyaw nga mapiang ang Gilas Pilipinas sa ilang pagsalmot sa FIBA Asia Cup gumikan kay ang PBA star center nga si JuneMar Fajardo kaduhaduhaan nga makaduwa human makaangkon og seryoso nga injury sa tiil.
Ang FIBA Asia buksan karong Agosto 9 didto sa Lebanon.
Ang Sugboanong si Fajardo nakahiagom og injury atol sa duwa sa San Miguel Beermen ug TNT KaTropa niadtong Miyerkules, apan kagahapon lang nahibaw-i nga seryoso ang iyang injury.
Ang mga physician miingon nga kinahanglan gyud nga ipahuway ni Fajardo ang iyang injury ug kuyaw kini nga mograbe pa kon iahat niya og duwa.
Ang PBA MVP nga si Fajardo nga uban ni Jayson Castro, mao ang mga team captain sa Gilas ug mao unta ang saligan ni coach Chot Reyes ilabi na nga wala ang naturalized center nga si Andray Blatche.
May posibilidad hinuon nga paubanon gihapon si Fajardo sa Lebanon, apan ang iyang physician nagtuo nga makaduwa kini sa maong torneyo.
Ang national team molarga paingon sa Lebanon ugma ug ila dayong sangkaon ang powerhouse China sa opening game karong Miyerkules. (BANAT NEWS)
- Latest