10th Emil’s Cup ‘sikad na

CEBU, Philippines - Ang two-time defending champion Team Samsam Gullas magsugod na sa ilang kampanya pagkulit og ‘grandslam’ sa dihang ilang sangkaon ang Aspa Scaffoldings sa 10th Emil’s Fresh Chicken Cup Inter-commercial basketball tournament nga mosikad na karong adlawa didto sa Minglanilla Sports Complex.

Makigtige ang Gullas squad batok sa Aspa sa pasiunang duwa sa alas- 6:30 sa gabii, sa dili pa ang SG-ARQ Builders makigharong sa Riss Lending/Eagles Express sa alas-7:30 sa gabii.

Sa main game sa alas-8:30 sa gabii, ang Fighter Wine 50 nga gipangulohan ni Roger Yap makigsangka sa San Remigio Properties.

Ang unom ka teams gibahin sa duha ka grupo, apan mag-abot gihapon silang tanan subay ang single round-robin format atol sa eliminasyon.

Ang top 2 teams matag bracket maoy mag-engkuwentro sa crossover semifinals. Ang mga mananaog mag-abot dayon alang sa titulo, samtang ang mga pildero mag-ilog sa ikatulong puwesto.

Ang usa ka semanang torneyo giorganisar ni Cebuano businessman/sportsman Jerry Oberes. (BANAT NEWS)