Gilas Pilipinas bitin sa training

CEBU, Philippines - Kompara sa ubang koponan nga mosalmot sa FIBA Asia Cup sunod buwan didto sa Lebanon, ang Gilas Pilipinas maoy kuwang og preparasyon kay karon lang  nila napinalisar ang ilang  line-up nga moduwa sa torneyo.

Nasayran nga ang mga ikasangka sa Gilas sa group stage nga China, Qatar ug Iraq dugay nang nangandam  ug pipila na ka mga dagkong torneyo ang giapilan nga kabahin  sa ilang preparasyon sa FIBA Asia.

Ang Gilas aduna na la’y 10  ka adlaw nga mangandam alang sa FIBA nga sugdan sa Agosto 8 diin ila dayon nga sangkaon ang powerhouse nga China.

Ang China mihimo na og mga tune-up games batok sa lig-on nga New Zealand ug Australia nga moduwa usab sa FIBA Asia, samtang ang Qatar miduwa sa Atlas Challenge ug ang Iraq mihimo sa ilang training camp didto sa Turkey.

Ang Gilas bag-o lang misalmot sa William Jones Cup, apan miduwa sa maong torneyo mao ang mga PBA rookies ug amateur standouts ug walay PBA stars.

Sa ilang bahin, ang Qatar determinado nga mobalik sa top three sa FIBA Asia Cup diin mikuha sila og naturalized player nga  si Sammy Monroe, kanhi   PBA import.

Ang Gilas moduwa nga wala ilang   naturalized center nga si Andray Blatche, hinuon motapak sa iyang posisyon mao ang 6-foot-8 Fil-German nga si Chris Standhardinger. (BANAT NEWS)