Star moparada sa bag-ong import
CEBU, Philippines - Masukod na ang labok sa bag-ong import sa Star Hotshots sa dihang ilang sangkaon ang Alaska Aces karong gabii didto sa Ynares Sports Center.
Ang Hotshots makigsangka sa Aces sa alas-7 sa gabii human sa duwa tali sa TNT KaTropa ug Kia Picanto nga sugdan sa alas-4:15 sa hapon.
Ang Hotshots mikuha ni US NCAA standout Malcolm Hill puli sa una nilang gikuhang import nga Cinmeon Bowers nga usa ka kanhi NBA D-League cager.
Daghan ang nahibulong sa daling pag-ilis og import sa Hotshots ilabi na nga midaog sila sa ilang opening game batok sa Blackwater Elite niadtong Domingo, 103-86.
Kinse puntos ra ang nahimo ni Bowers, apan posible pa kini nga mosaka pa kay una pa lang kini niya nga duwa.
Hinuon, ang coaching staff sa Hotshots masaligon nga mas mosalig pa sila ni Hill sa ilang kampanya karon nga conference uban ang paglaum nga makabalik sa finals.
Sa ilang bahin, ang Alaska dili hinuon motugot nga mabiktima sila sa Star ilabi na nga nasagunsonan sila og siyam ka pilde sukad pa sa Commissioner’s Cup.
Sa unang duha nila ka duwa sa Governors’ Cup, ang Aces nasugamak dayon batok sa NLEX Road Warriors ug dayon sa Phoenix Fuel Masters. (BANAT NEWS)
- Latest