Wall mipirma na, nagpahigot 4 ka tuig sa Wizards
CEBU, Philippines - Hingpit nang gipirmahan ni John Wall ang upat ka tuig niyang ‘contract extension’ sa Washington Wizards nga mibalor og $170 million.
Ang presidente sa Wizards nga si Ernie Grunfeld maoy mipahibawo niining maong kalamboan.
Sa iyang video post sa Twitter usa ka semana ang milabay, si Wall mipadayag nga ang paglugway sa iyang kontrata magsugod sa 2019-2020 season ug duna siya player option sa 2023-2024.
Si Wall nga upat ka higayon nahimong Eastern Conference All-Star, maoy ikatulong player nga nakatukob og “supermax” extension sa NBA sunod nilang James Harden sa Houstons Rockets ($228 million) ug Stephen Curry sa Golden State Warriors ($201 million).
Gumikan niini, nakompleto na ang ‘Big Three’ sa Wizards nga naglangkob sab nilang Otto Porter Jr. ug Bradley Beal.
Si Wall, ang No. 1 pick sa 2010 draft, mipatik og career-high average nga 23.1 points, 10.7 rebounds ug 2.0 steals matag duwa sa miaging season. Sa pito ka tuig niya sa liga, duna siya’y average nga 18.8 puntos matag duwa.
“Returning to the only team I’ve known in my professional career was an easy decision for me,” matud pa ni Wall. “I understand my role as the leader of this franchise and I will continue to work hard to improve my game and make our team better. (BANAT NEWS)
- Latest