Kulbahinam nga season

CEBU, Philippines - Bag-ong imports, bag-ong coaches, pipila ka mga talento gikan sa nagkadaiyang lungsod ug usa ka dekalibreng Senior High All-Star ang  moladlad na sa iyang abilidad sa college division.

Pipila lamang kini sa mga lamas nga mopalami og maayo sa Cebu Schools Athletic Foundation, Inc. (CESAFI)  Basketball Season 17 nga mosikad  karong Agosto 5 diha sa Cebu Coliseum.

Seguradong adto mapunting ang atensiyon ngadto ni Raul ‘Yayoy’ D. Alcoseba sa iyang debut isip head coach sa University of  Cebu (UC) Webmasters batok sa kanhi niya team, ang Southwestern University-Phinma (SWU) Cobras sa season-opener.

Sa wala pa nakabira og tulo ka tuig nga kontrata uban sa UC, si Alcoseba mitunol og duha ka kampiyonato sa Southwestern U  sulod sa lima ka tuig.

Sa labing unang higayon, si Alcoseba makigbangga ni Mike Reyes, nga taud-taud niyang assistant, apan karon mao na ang motimon sa Cobras.

Gawas sa UC ug SWU, ang University of San Carlos (USC) Warriors duna sa’y bag-ong coach nga si Bong Abad.

Sa labing unang higayon sa 17 ka tuig nga kasaysayan sa liga, ang Webmasters ug ang University of Southern Philippines Foundation (USPF) Panthers moparada og langyaw’ng magduduwa.

Si Alcoseba mikuha ni 6-foot-7 Cameroonian Frederick Ngoh Elombi aron mopalig-on sa Webmasters, samtang si USPF coach Albert  Alocillo mibira ni 6-foot-8 Nigerian Rich Managor aron tabangan ang lokal niyang mga batos.

Sa pito ka college teams, tulo lamang ang adunay imports. Ang lain mao ang defending title-holder University of the Visayas (UV) Green Lancers nga mikuha og balik ni 6-foot-7 Liberian Bassieru Sackor nga mitabang kanila pagdaog og titulo niadtong 2013.

Gawas sa mga imports, duna sa’y hugpong sa mga sumusulbong nga talento nga angayan tutokan sa liga. Ang ilang kahanas sa  pagduwa nasigpatan sa malampuson nga 1st Cebu Governor’s Cup Under-21 Inter-Cities and Municipalities Basketball Tournament.

Pipila sa labing maayo nga produkto sa maong torneyo gikuha sa nagkadaiyang varsity teams, tulo kanila gikan sa labing  unang Governor’s Cup champion nga Minglanilla Archangels. Sila mao si Jiezel Tarossa (UV Lancers), Jan Mangaron (University of  San Jose-Recoletos Jaguars) ug Mark Justine Nebril (UC Junior Webmasters). Si Jhamer Ranceli sa Mandaue City anaa na karon sa  Panthers.

Ang uban mao sila si Miguelito Jusay sa Tuburan, Louie Jay Señagan sa Samboan ug Hanzel Tago-on sa Ginatilan (UC high  school), Shawn Barola sa Dalaguete ug Romyr Kirt Gonzaga sa Tuburan (USC Baby Warriors) ug Gyle Patrick Montaño sa Consolacion  (SWU Baby Cobras).

Angayan sab nga atngan ang gikaintapang Senior High center nga si Jancork Cabahug nga moduwa na karon sa kolehiyo.  Ang  19-anyos ug 6-foot-2 nga higante gilantaw nga makapalig-on og samot sa gikahadlokan nang daan nga puwersa sa UV.

Kon sumadahon kining tanan, ang mga Sugbuanon seguradong makalantaw sa unahan sa mas kulbahinam ug eksplosibong  aksiyon sa 2017 CESAFI season. (BANAT NEWS)