P30T premyo idalit sa 2nd CYLI Open chessfest

CEBU, Philippines - Dul-an sa P30,000 nga ganting salapi ang giandam alang sa mga mananaog sa 2nd Catalyst Youth Leadership Institute (CYLI) Open Chess Challenge for a Brighter Future 2017 nga gikatakda karong Agosto 5-6 diha sa Knight Atack Chess Cafe sa Robinsons Galleria Cebu.

Gawas sa mga tropeyo, ang makampiyon ning 8-round Swiss system competition mobulsa og P7,000, samtang ang mopahiluna sa ikaduha hangtod sa ikalimang dapit modawat og P5,000, P3,000, P2,000 ug P1,000.  Ang 6th-10th placers adunay P500 matag usa, samtang ang 11th-15th makaangkon og tag-P300. Ang top 2 kiddie (12-under) ug female players dunay mabira nga P1,000 ug P500, samtang ang labing maayong magduduwa (25-under) gikan sa UC, USC, USJ-R, SHS-Ateneo ug Marie Ernestine School makadawat og P500 matag usa gawas nga sab-itan og medalya.

Ang registration fee nagkantidad og P200 sa kiddies (12-under) ug P300 sa mga hamtong.  Alang sa dugang mga kasayoran, mahimong mokontak ni FIDE Arbiter Marvin Y. Ruelan sa 0926-7352951. (BANAT NEWS)