Gilas Final 12 ginganlan na, Blatche wala maapil

CEBU, Philippines - Ginganlan na ang Final 12 sa Gilas Pilipinas nga moduwa sa FIBA Asia Championship karong Agosto 8 didto sa Lebanon.

Wala gyud maapil si   Andray Blatche nga una nang gikataho nga wa’y interes moduwa tungod sa iyang kabalaka sa seguridad didto sa Lebanon.

Gumikan niini, si Reyes magsalig  sa iyang mga local stars nga sila si Jayson Castro, June Mar Fajardo, Calvin Abueva, Japeth Aguilar, Terrence Romeo, Matthew Wright, Raymond Almazan, Jio Jalalon, RR Pogoy, Carl Bryan Cruz ug Gabe Norwood.

Ang Fil-German nga si Chris Standhardinger maoy mohulip ni Blatche.

Duha sa mga orihinal nga sakop sa Gilas nga miduwa sa miaging SEABA nga  sila si Allein Maliksi ug Troy Rosario dili   moapil  kay  adto sila  moduwa sa SEA Games sa sunod buwan gihapon.

Bisan pa niini, si Norwood  masaligon nga makuha nila ang gold medal.

Nagkanayon si Norwood nga makaya ra nila ni June Mar Fajardo ug Japeth Aguilar ang mga bigmen sa ubang koponan tungod sa kasinatian sa duha sa internasyonal nga mga torneyo.

Ang Gilas misakmit og silver medal sa miaging 2015 FIBA Asia didto sa China.

Gawas sa China, Iran ug South Korea nga   daan na nga mga kontender sa Asya, misulod na usab karon sa Asian zone ang New Zealand ug Australia nga nakabug-at  sa bagahi sa Gilas.

(BANAT NEWS)