Lazaro, na Patikan pabiling way pilde sa Monday Squad
CEBU, Philippines - Ang Team Lazaro mipakaging sa SG-ARQ Builders, 71-53 alang sa ikatulo nilang daogsa Monday Squad Basketball’s 1st Open 5’10” Under Tournament diha sa Casals Village gym sa Barangay Mabolo, dakbayan sa Sugbo.
Si Fredie Ninel maoy nangulo sa upat ka players nga dunay double figures uban sa iyang 15 puntos sa dihang gipahugtan sa Lazaro ang ilang pagkupot sa liderato sa Bracket B bitbit ang 3-0 record. Si Ninel gipaluyohan nilang Jie Dablo, Rumar Ponce ug Barok Ceniza nga mihipos og 11 puntos matag usa.
Sa uban pang duwa sa Bracket B, ang Greywolves ug Cavaliers mitumba sa ilang mga kontra alang sa labing una nilang daog.
Sila si Christian June Sumalpong ug Ruel Navarez nagkumboya’g 35 puntos sa dihang ang Greywolves mihambat sa Ball Is Life, 67-61, samtang si Clint Florindo mipabuto og 20 puntos ug si Joel Alguno midugang og 12 puntos alang sa Cavaliers nga mipatikangkang sa Wye Delta, 74-66.
Ang Greywolves, Cavaliers ug Ball Is Life Alumni nagtangag karon og parehong 1-1 nga baraha, samtang ang Wye Delta nagpabiling wa’y pilde sa duha ka duwa.
Sa laing aksiyon, si Noel Torrefiel mitali og 18 ug si Werdy Lopez mipupo og 17 puntos sa dihang gilampurnas sa Na Patikan milubong sa Tropang Ballers, 68-44 aron pagduyog sa San Remigio Properties sa liderato sa Bracket A uban ang managsama nilang 2-0 nga baraha.
Si Michael Tan dunay 10 puntos sa dihang gipiog sa Kokem Builders ang PN Alumni sa iskor nga 55-41, samtang sila si Jimmy Ople, Fernando Argones, Erwin Seneca ug Mark Ypilan nagkumboya’g 46 puntos aron ituboy ang AGM Irish ngadto sa 67-55 nga kadaogan batok sa Victorious Secret sa iskor nga 67-55.
Ang Kokem Builders ug AGM Irish duna na karo’y 2-1 records. (BANAT NEWS)
- Latest
