Donaire moaway karong Oktubre
CEBU, Philippines - Si kanhi four-division world champion Nonito ‘The Filipino Flash’ Donaire Jr. mipirma og multi-fight promotional contract uban sa Ringstar Sports ni Richard Schaefer, ang kanhi CEO sa Golden Boy Promotions nga karon duna na’y kaugalingon niyang kompaniya.
Ang 2012 “Fighter of the Year” nga si Donaire gitamod isip usa sa labing maayong boksidor sa mas gaan nga timbang.
Nakampiyon siya sa flyweight, bantamweight, junior featherweight ug featherweight.
Sayo ning tuiga, si Donaire ug ang kanhi niya promoter nga si Bob Arum sa Top Rank nagkasinabot nga mag-iyahay sila og dalan.
Gikalipay og dako ni Donaire nga anaa na siya karon sa poder ni Schaefer, nga usa sa labing hait kon pagdumala og boksing ang hisgutan.
Ang 34-anyos nga si Donaire dunay 37-4 record uban ang 24KOs. Wala na siya makaaway pa sukad gihuboan sa iyang WBO super bantamweight title ni Jessie Magdaleno niadtong Nobiyembre sa miaging tuig didto sa Las Vegas.
Masaligon si Schaefer nga makakuha siya og dakong away alang ni Donaire batok sa kasamtangang mga kampiyon nga sila si Leo Santa Cruz, Abner Mares o Lee Selby nga pulos gidumala ni Al Haymon nga iyang higala.
Tumong ni Schaefer nga makaaway og balik si Donaire karong Oktubre. (BANAT NEWS)
- Latest
