Biometrix Kampiyon gihapon
CEBU, Philippines - Daw gibayaw sa kalangitan ang Biometrix Systems & Trading Corp. nga nakasungasong sa tanang mga pagsulay aron madaog ang ‘back-to-back’ championships sa Inter-Christian Basketball League (ICBL).
Ang Biometrix midaog human makalingkawas batok sa Regeneration, 80-77 sa finals sa ICBL Season 3 niadtong Domingo sa San Vicente gym sa Yati, Lilo-an.
Kulba kaayong nakaduwa si Domingo Bucatan, kansang duwa wala gyud molubad gikan sa pagsugod hangtod sa katapusang pitik sa orasan aron mangulo sa tanang scorers sa Biometrix pinaagi sa iyang 26 puntos. Si Bucatan nakapundo na og 20 puntos sa first period diin ang Biometrix nilabaw, 24-22.
Paspas apan sikit kaayo ang aksiyon sa duha ka karibal nga miresulta ngadto sa 13 ka panagtabla.
Labaw ang Biometrix og singko puntos, 51-46, apan kalit nausab ang dagan sa duwa human mailog sa Regeneration ang labaw, 60-57 sa sayong bahin sa fourth quarter. Misamot ang kalbaryo sa Biometrix dihang migradwet ang usa sa ilang sinaligan nga si Joseph Godinez sa nahibiling tres minutos sa duwa.
Imbes maluya, ang Biometrix nilang coach Marlowe Pototoy ug Josephus Contratista ug kasosyo sa negosyo nga silang Jeoffrey Julia, Jaime Ozarraga ug Josephus Contratista, nadasig hinuon sa pakigbisog hangtod naangkon ang tungason nga kadaogan.
Si Elton Mondejar miamot og 15 puntos, samtang sila si Barry Mondejar ug Ritchie Bucatan miabuno’g 11 ug 10 puntos matag usa.
Dobleng selebrasyon ang naangkon sa Biometrix kay tulo sa ilang players ang naapil sa Mythical Five pinangulohan ni MVP Joseph Godinez uban nilang Domingo Bucatan ug Ritchie Bucatan ug silang Emeben Ageas ug Bogz Gonzales sa Regeneration.
Ang Regeneration team manager/coach Gamaliel ‘Gamz’ Ermac gipangulohan ni Ageas nga mipabuto’g 22 puntos, gisundan ni Franie Suzon nga adunay 14 puntos.
Ang liga nahimong posible tungod sa paningkamot ni commissioner Ernie Sibonga inabagan nilang John Irving Sibonga ug Jun Nelmida ug ingon man nilang Normal Tisoy, Jeper Barriga ug Ronron Ycon sa CEBRA.
Puntos matag usa
BIOMETRIX (80) – D. Bucatan 26, E. Mondejar 15, B. Mondejar 11, R. Bucatan 10, Anonat 9, Godinez 7, Aton 2, Matos 2, Soco 2.
REGENERATION (77) – Ageas 22, Arena 14, Suson 10, Gonzales 10, Deniega 10, Evardo 10, Castro 4. (BANAT NEWS)
- Latest
