Rose miuyon na sa Cavs
CEBU, Philippines - Ang free agent point guard nga si Derrick Rose gikatakda nga mopirma og usa ka tuig nga kontrata nga mobalor og $2.1 million uban sa Cleveland Cavaliers.
Si Rose nga nahimong labing bata nga MVP sa NBA niadtong 2011, nakigtagbo sa mga kadagkoan sa Cavs didto sa Ohio kagahapong adlawa.
Gitaho sa Cleveland.com nga si Rose miuyon nga moduwa uban sa Eastern Conference champions human ilang gituki kon unsaon pagbalik sa Cavs sa Finals bisan og wala na si Kyrie Irving.
Gisaytan dayon sa Cavs si Rose human ang 25-anyos nga si Irving mihangyo sa Cleveland management nga i-trade siya gumikan kay gusto na siyang mohawa sa anino ni LeBron James.
Ang pag-abot unya sa 28-anyos nga si Rose makapalig-on og balik sa backcourt sa Cavaliers kon ugaling madayon ang pagpabalhin ni Irving ngadto sa laing team.
Si Rose mi-average og 18 points, 3.8 rebounds ug 4.4 assists sulod sa 64 ka duwa uban sa New York Knicks sa miaging season.
Nakuha siya sa Knicks pinaagi sa usa ka ‘trade’ uban ang Chicago Bulls diin si Rose miduwa sulod sa lima ka tuig.
Dili na man tuod siya eksplosibo kon itandi sa miaging unom ka tuig ilabi na kay kanunay siyang hamukon og injury, dili gihapon kakompiyansaan si Rose kay moiskor gihapon siya ilabi na kon gikinahanglan sama sa nakuha niyang mga numero sa Knicks. (BANAT NEWS)
- Latest
