J.J. Surplus nakauna batok E.F. Surplus

CEBU, Philippines - Naunhan sa J.J. Surplus ang E.F. Surplus human makaipsot sa ligas kaayo nga resulta, 107-106 sa Game-1 sa “best-of-three” finals series sa J.J. Surplus Ballclub  8th Conference basketball tournament niadtong Sabado sa gabii didto sa GT Academy gym sa Tayud, Lilo-an.

Si Jomar Tiwan miratsada og  32 puntos aron pangulohan ang J.J. Surplus nga miabante og usa lang ka lugas sa halftime 46-45.

Mitampo sab og 28 puntos si Larry Oroyan, samtang ang team owner ug ballclub president nga si Henry Agbon miamot og  14    puntos    sa    iyang koponan  nga nagkinahanglan na lang og usa ka daog aron langkaton ang korona.

Si Ken Nuñez mao sab ang nangulo sa napildeng E.F. Surplus pinaagi sa iyang 29 puntos, gisundan ni Anton Trangia nga adunay 26 puntos. Si Wendel Palo mitampo og 14 puntos, samtang ang team owner nga si Fury Trazona, kinsa mao sab ang  league commissioner nalimitahan lang ngadto sa 12 puntos.

Naglabaw unta ang E.F Surplus sa first quarter, 24-19, apan gipapas kini sa kugihang J.J. Surplus ug mao na ang nilabaw, 46-45 sa halftime.

Sa laing duwa, ang Northern Energy milubong sa Jammers, 69-58 sa Game-1 sa kaugalingon nilang “best-of-three” series alang sa ikatulong puwesto.

Sa gilauman, si Uljie Takayuki mao gihapon ang topscorer sa Northern  Energy nga mipatuasik og 20 puntos. Si Eman Montealto miantog og 12 puntos sa team ni Eric  Tiongzon nga milusad og 30-6 nga pangataki nga maoy gihimo nilang taytayan paingon sa kadaogan.

Ang napildeng Jammers ni Albert Icot gipangulohan sab ni Lorca nga mipaarak og 24 puntos.

Ang Game-2  gitakda ugma sa gabii  didto gihapon sa GT gym.

Puntos matag usa

Unang duwa:

J.J. Surplus (107)  –   Tiwan 32, Oroyan 28, H. Agbon 14, Gentereloso 10,  Adolfo 7, Mangubat 5, Commendador 5, Astillero 4, J.H. Agbon 2.

E.F. Surplus (106) – Nuñez 29, Trangia 26, Palo 14, Trazona 12, A. Sabang 11, Caparroso 2, A. Pepito 2, Ponce 2, K. Sabang 2, Caballes 2.

Ikaduhang duwa:

NORTHERN (68) – Uljie 20, Montealto 12, Ardimer 9, Acabo 7, Tiongzon 6, Gumoza 5, Talisic 4, Garbo 3, Yuson 2.

JAMMERS (58) – Lorca 24, Martinez 8, Burgos   7,   Illustrisimo 6,  Cahutay  3, Quining 2, Icot 2, Nepangue 2, Villosillo  2, Illustrisimo 2. (BANAT NEWS)