Sunsport modawat og onsite registration
CEBU, Philippines - Ang Sunsport Basketball modawat og onsite registration alang sa ilang expanded training camp nga mosikad karong Agosto 6 diha sa Sacred Heart Center Sports Club kilid sa Sacred Heart Church sa may dalan D. Jakosalem ning dakbayan sa Sugbu.
Kini nagpasabot nga kadtong mga mahilig og duwang basketbol nga gustong bairon pa og maayo ang ilang abilidad mahimo pang magparehistro sa binyu atol mismo sa pagsugod sa clinic.
Si camp director Giovannie “Jojo” Romarate Teves mipadayag nga mopahigayon sila sa tinuig nilang kalihukan matag summer lamang apan gumikan sa awhag sa publiko, napugos sila pagbuhat og senemanang camp sunod bulan.
Ang training session ipahigayon matag Domingo gikan sa alas-10 sa buntag hangtud sa alas-12 sa udto. Abli kini sa mga basketbolista nga nag-edad og siyete hangtud sa 19 anyos.
Sama sa miagi nilang mga clinic, si Romarate mipasalig nga ang mga partisipante makat-on dili lamang sa saktong pamaagi pagduwa og basketbol apan hasta sab sa teknikal nga aspeto sa duwa.
Ang rehistrasyon nagkantidad og P1,200 apil na niini ang upper jersey ug Sunsport basketball 2017 edition.
Alang sa dugang impormasyon, kadtong mga interesado mahimong motawag ni Romarate sa 0923-8697421 o 0929-1219373 o dili ba sa buhatan sa Sunsport sa 345-1015. (BANAT NEWS)
- Latest
